Yumi

搬．．．

2008-08-12T23:55:00.001+08:00

用左呢個blog都好長時間，近日太多朋友改去yahoo０個邊．我都跟住走先．
http://hk.myblog.yahoo.com/twinstar9992000

可怕新聞 - 關於湊bb...

2008-08-03T12:24:00.004+08:00

【明報專訊】初來港兩個月的印尼籍女傭，涉嫌於上月23日搖晃只有6個月大的女少主，令她出現嘔吐情况，女嬰日前情况惡化，要接受開腦手術，至今昏迷。印傭被控虐兒罪，案件昨在九龍城裁判法院提堂，被告暫毋須答辯，裁判法官指案情嚴重，將來或改控謀殺，故不准被告保釋，還押看管。
任職家庭傭工的印尼籍女被告Nofi Utami（21歲）被控一項虐兒罪。據悉，案中6個月大女嬰於7月23日被家人發現神情呆滯和嘔吐，被送往醫院檢查。女嬰留院。至本月30日，醫生指女嬰腦部受創，被告始透露女嬰曾墮地受傷。至8月1日，女嬰情况惡化，送往深切治療部及接受開腦手術，手術後至今仍然昏迷。醫生指女嬰頭部有骨折和腦部受損，徵狀似搖嬰造成多於墮地受傷。
接受開腦手術後仍昏迷
案情指出，被告於今年7月23日在觀塘康雅苑桃雅閣某單位內，故意導致、促使黃姓女嬰受虐或忽略，使她受到不必要的健康損害。案件押後至8月29日於觀塘裁判法院提訊，控方要求索取女嬰的醫生報告和法律意見，再根據證據強弱決定被告的控罪。
暫控虐兒按證據決定控罪
______________________________________________________________________
見到呢單新聞,心都痛埋.點會有d咁嘅人. 我吾知係咪個bb成日喊攪到個工人煩,定係個主人對呢個工人吾好, 點都好, 都吾可以咁對一個手無寸鐵的小朋友, 就算係大人都吾可以咁la... 我成日講, 將心比心, 所以我會對個工人好好, 我番左工,佢對我個仔吾好都無人知呀 !!!

介夜奶

2008-07-27T09:27:00.001+08:00

柏言上個星期好似開始介夜奶, 比如夜晚11點幾飲左奶, 佢可以直到第2朝6點幾7點先起身. 平時日頭佢都係4個鐘左右就喊揾野食. 夜晚可能無電視聲無咁嘈啩 !!

不過因為早2日個工人到左, 細房同個廳好多傢具大執位. 天氣又熱到咁. 晚晚開冷氣, 個風口又整極都向到我. ( 嘗試過用card 紙遮住個風口位, 吾郁個風"葉" . 都係吾得 ) . 但老公同個仔又熱到出汗, (都吾知點解開左冷氣都可以成身汗),已經係high cool 5 度la. 凍死我咩 !!! 我唯有掉轉頭瞓. (點解一開頭吾掉頭 ? 係因為另一面有橫樑, 加上我好怕個仔夜晚嘔奶我睇吾到.我就開左小小門等d光入房, 不過掉左頭就咩都睇吾到.除非開好大門 )

吾知係咪咁,個仔又熱番, 可能個大衣櫃放左0係佢隔離, 阻住d冷氣, 佢呢2日好醒瞓, 3個鐘左右起身, 不過佢又係揾野食咁, 只係喊, 又氹吾番佢瞓. 比個奶咀佢又吾食. 心諗吾係呀,我就黎番工你又半夜起身 ??!!

諗左成日, 點解食奶會食番轉頭... 尋晚同老公講.佢都話熱. 又熱 ??!! 咁我推出小小, 吾好咁近衣櫃同牆. 果然, 尋晚11:20pm 食完. 今朝05:00am 先起身. oh. 如果今晚都係咁, 即係話我估計無錯, 最多我著多件衫瞓la !!!

介左夜奶就好la. 大家都吾洗咁辛苦, 同埋好怕3,4點嘈到隔離屋呀..

我超鍾意呢張相,好似村姑呀.係謝夫用條沙巾包住亞仔,睇親張相我都會笑...

第一次發燒...37.9度....

2008-07-22T13:14:00.003+08:00

柏言尋日去左舅公度打5合一第一支針,同埋肺炎鏈球菌針,左右腳每邊一支,媽咪見到心都痛!! 姑娘比定支退燒水我地,因為打左呢支針可能會發燒...

今朝媽咪如常餵我食奶.daddy 今日開始番早, 好早佢就出左去番工,得番我同媽咪, 飲完奶我都無睡意.媽咪同我分別睡上床,佢望住我,仲同我影相,一直無事, 我開始流口水, 慢慢仲流小小奶水出黎,媽咪正想抱起我之際,我已嘔奶,嘔到成床成身都係,嚇到媽咪面青腳仔軟, 之後媽咪同我換左衫,抱左出廳,佢就清理場地, 洗床單, 媽咪洗洗0下, 一路諗點解我會嘔奶, 又成日行出黎望0下我咁, 突然諗起會吾會我吾舒服,摸一摸我額頭仔, 好熱 !! 即刻揾溫度計,37.9度, 說明書無講幾多度係發燒,媽咪急到想喊,即刻打比小燕姨姨,叫佢即刻黎,小燕姨姨先安撫左媽咪,好快就黎到... 媽咪又打左比姑媽,姑媽之前做護士ca,佢話吾洗怕,吾洗飲退燒水住, 打左針發燒係正常反應.佢又打左比嫲嫲, 之後佢又打媽咪, 佢叫媽咪比水我飲, 咁早嘈醒哂咁多人,都係因為我有個論盡媽咪 !!!

小燕好快黎到,同我抹身,check 住溫度. 媽咪就放心哂了.....

之後婆婆都黎左睇我.....

柏言呀. 媽咪真係好驚呀. 你千萬吾可以有事呀 !!!

另外, 我已經改左中碼尿片la.我個身同肶多左肉呀..daddy好小同我換片,有日問媽咪點解條片咁細,笑死媽咪,媽咪話吾係條片細左,係柏言個大雞肶肥左呀...攪笑 !!!

柏言2個月

2008-07-13T11:46:00.003+08:00

話咁快就2個月了,睇0下有咩吾同 ....
面型 : 有肉左,有雙下巴.
身型 : 長左, (即係高左la )
體重 : 未知重幾多,下星期去健康院先知,不過應該有10磅了.
食量 : 5-6安a+奶粉.
聲音 : 越來越大聲,吾似貓仔聲. ( 喊0個時好勁 )
嗜好 : 食,喊,瞓,扭, 睇電視.
可以做的動作 : 短時間抬頭, 捉住人地人指, 頭仔同眼睛會跟隨聲音方向左右郁.
最鍾意顏色同最鍾意明星 : 未知 !!
最愛的人 : 媽咪 ( ha ha ha...)

勞氣

2008-06-25T15:43:00.000+08:00

對住老公, 只有2個字--勞氣 !!!!!

早幾日我同bb沖涼 ( 我係好生手, 因為平時係小燕同佢沖 ) . 老公都無幫手, 沖完叫佢幫我拎毛巾包住個仔, 點知佢真係拎條毛巾比我.放0係我腳上, 你都應該放好d打橫條毛巾,等個仔一上水可以包住呀. 條毛巾又打直又叠住咁,都吾知點包. 好la.我地入房著衫, 又叫老公幫手拎棉花同個仔洗肚臍la.佢又真係只會拎棉花,吾識拎埋水呀, 棉花棒. 真係叫一樣做一樣 !!

好似坐梳化. 講過幾多次吾好"一野坐落梳化" ( 即係好高咁一坐坐落去 ) . 一黎好易整到個仔, 可以屈到佢腳仔吾知, 2黎0係咁高突然坐落去,個仔吾知咩事可能會嚇到佢 !! 講左吾知幾多幾多次. 都係吾聽 !!

個仔一喊就成日郁手郁腳, 你抱佢行黎行去0個時永遠吾會留意0下個風扇. 我真係好怕佢隻手呀腳呀咁細會捲到入風扇, 你又係永遠吾聽. !!

尋晚個仔吾瞓, 你又話要開奶, 都吾知要個仔飲幾多你先安樂 !!

開左冷氣, 竟然同個仔換衫換件無"就"嘅, 都吾會著件厚小小 !!

尋晚又吾知點抱, 抱到佢撞到個頭 !!

好似之前我話同個仔轉奶粉, 我話逐次轉, 你又話溝奶粉 !!

我話吾好成日3個鐘比奶佢, 佢飲多左就應該耐小小先再比奶佢, 你又係吾會信我 !!

對住你, 我真係好勞氣, 好死心, 你有無拎個心出黎, 如果兩公婆都係吾信任, 我講咩你都係吾聽吾信吾理, 咁呢段關係點可以維持 ??!!!

好腳力 !!

2008-06-23T15:15:00.000+08:00

http://hk.myblog.yahoo.com/twinstar9992000/article?mid=69

床都比佢整爛 !!

打 " c " " egg" ??!!

2008-06-22T13:50:00.002+08:00

http://hk.myblog.yahoo.com/twinstar9992000/article?mid=67

從小到大,媽咪都話飲吾夠水會打 " c " " egg " . 不過原來bb未出世0係個肚入面時已經會打 " c " "egg " . 柏言成日飲完奶都會.姑娘教過我地如果bb打"c" "egg" . 一係比水佢飲, 一係整喊佢, 不過原來吾理佢, 佢一陣都會無事 . ha ha !!

打針

2008-06-20T00:04:00.003+08:00

今日柏言去健康院打第2支乙形肝炎針. 本身佢瞓緊ca.比姑娘一支針打埋黎,成個醒哂, 仲成塊面紅哂tim. 心都痛埋 !!

今日仲同佢量頭size 同磅重, 重左好多呀. 出世2.885kg. 今日4.395. 即係9.669磅呀. 一定係佢食日食完奶又吾做運動. 即刻瞓. 咁就肥仔low. 之前我成日同佢講. 你成日喊我"室"番你入我個肚肚度ca. 唉, 宜家吾得la. 成10磅人仔, 我個肚真係放你吾到呀 !!

睇番之前d相, 柏言真係肥左, 塊面多左肉,不過媽咪話吾好向住佢講. bb小器wor. !!

滿月宴

2008-06-16T14:07:00.004+08:00

柏言一個月了, 0係沙田明星坊同親友食飯. bb全程sleeping,不過番到屋企就玩到我暈!!!

因為小燕星期日休息,所以星期六5點開始我就要自己湊佢湊,夜晚當然瞓得吾夠.到星期日早上媽咪雖然過左黎,不過我都係瞓吾到. 直至食完飯番黎. 已經12點. bb又飲奶,攪到12:30. 諗住可以瞓,點知佢吾瞓,又扭計,應該係扭瞓,都打哂喊路, 比左奶咀佢. 瞓左 ! 抱到點幾,抱入房, 個奶咀甩左, 吾理la. 點知佢醒左, 又喊. 又抱番出廳 !! 好快又瞓番. 今次我以為好叻呀. 抱到入房個奶咀又甩, 我即刻整番入口, 點知佢都係醒, 又抱走. 來來回回4次. 3點 !! 我忍吾住, 開左奶, 佢飲哂4安 !! 佢就即刻瞓到好"林" . 難為我仲要同佢掃風. 4點 !!! 今朝06:30 又飲, 就係咁. 我頭都爆哂 !!

不過尋晚我真係好忟, 我真係好眼瞓, 我好大力打左個仔幾0下pat pat , 仲係咁鬧佢, 今朝諗番, 其實佢又吾識, 佢喊佢都吾想,佢都好辛苦, 我怪錯左佢, 打錯左佢 !!!

尋日食飯發生左小插曲,話說英姨同細表弟黎到, 話細表弟跌親隻手甩"較" . 之後去左睇跌打, 原來甩左2個"較" !! 比佢地嚇親,好左無事 !!!

我地家族好鍾意玩大抽獎, 人人入 $20 入利是封,抽到有得分. 尋日total 有40封,咁就抽4位,人人有10封咁. 結果幸運兒係老公舅父,老公表弟, 我表弟亞漢(英姨大仔) 同千恩. 之後個個話吾夠. 媽咪同老公再拎$100 出黎再抽. 伯娘同吾知邊個抽到 ( 玩到吾記得tim ) . 我地笑話伯娘番長洲可以坐頭等位. 佢地再叫我加碼, 我話已經拎左一鑵奶粉出黎la. 亞仔無野食呀. 一係拎有"料"尿片出黎抽呀. 點知吾知0係度又多左枝紅酒, 又抽, 老公亞哥中左. abby話拎5隻紅雞蛋出黎抽. 3号枱食吾哂枱上的"包如" 又話要抽. 個個都玩到好開心.

真係多謝哂咁多位. 祝大家父親節快樂, 身體健康呀.

耐性

2008-06-14T17:54:00.002+08:00

耐性--相信我同我老公都無 !!

bb喊有好多種原因. 可以係扭計要抱, 肚餓, 尿片濕左, 扭瞓,被嚇親, 想飲水, 熱.吾舒服.....甚至無原因 !

我的想法同做法 : 第一時間睇0下佢,望0下條片係咪濕左,係有尿尿定便便. 用個奶咀頂住先, 吾想佢一路喊嘈住人地, 又怕佢喊到聲沙. 盡量吾會即刻抱佢.怕抱慣! 如果佢真係吾收聲,我就抱起佢同佢傾計, 真係未夠鐘飲奶就比水佢飲, 一路抱佢一路同圍行.氹0下佢. 好多時都揾到佢咩吾舒服, 不過夜晚就差d. 朋友都話夜晚bb係扭計d,最怕佢嘈住老公,佢要4,5點起身,本身都吾夠瞓,佢都好辛苦. 不過有時我真係投降.好似前晚同尋晚,都要老公幫手. bb有時好奇怪, 你換個抱佢手勢, 或者比另一個人抱,佢都會停止吾喊. 總之, 你估佢吾到.

我老公想法同做法 : 喊 = 肚餓 . 無論係咪夠鐘.都比奶佢食,佢就吾喊 !!

我同老公講. bb吾會知飽,佢只會食濟, 吾怕餓親. ( 好多朋友都係咁講 ) . 佢食3安奶,就應該3個鐘之後再食奶, 如果佢食左5安奶又係3個鐘之後食奶, 咪食到佢d時間錯哂low. 佢開頭吾信. 之後慢慢聽我講, 不過bb一喊,佢第一句就問我 : 夠鐘食奶味. !! 如果夠,我都開左奶la !!!!!!

老公呢2晚都表現不滿的樣. 我都吾想嘈到佢, 不過個仔你都有份. 佢喊 . 我都吾想ca !!!

柏言一個月了

2008-06-13T21:12:00.000+08:00

http://hk.myblog.yahoo.com/twinstar9992000

個仔個樣吾同左, 易喊呀.成日要人抱.一要食奶就喊

掛念

2008-06-12T14:19:00.003+08:00

今日係老豆死忌. 過左咁多年.仍然好記得0個晚,醫院打黎.我地即刻去醫院,亞哥駕車仲淨D行錯路.大家心神不定,去到醫院老豆已經走左. 我好嬲,點解你咁忍心咁快走..到宜家.每當我開心,吾開心,有難題,有煩惱,都會0係心入面同你講.我好希望你聽到. 好希望同你分享.

老豆 : 你要保佑媽咪身體健康, 保佑你個孫快高長大.

結婚2週年

2008-06-11T16:50:00.005+08:00

原來bb咁樣沖涼係好舒服同好有安全感.

bb話咁快就黎一個月了, 媽咪買左2套衫仔比佢星期日滿月食飯時著ca ^_^

2年前的今日.我就做左何太. 今日.我就做左媽咪 !!

無甜言蜜語,無禮物. 老公話 : 我忍左你2年都無離婚, 應該慶祝.

係呀. 老公, 我吾再愛你了, 我會把我所有愛比哂個仔 !!

肚餓 ??!!

2008-06-08T17:57:00.005+08:00

你睇佢一喊起上黎.係咁撐. 隻腳可以頂住張床圍 !!

daddy 同小b玩得好開心呀. 其實係分散佢注意力. 媽咪去左邊 ?? 沖奶low. 吾係bb又喊ca la !!

小b飲奶的指定動作. 撐高腳指公. ha ha !!

都吾明點解bb肚餓會咁準時. 好似食左個鬧鐘咁,3個鐘就3個鐘. 吾會多過5分鐘小過5分鐘, 佢地肚餓只係喊.當你見到佢喊,你先開始同佢換片. 開奶, 0個時佢已經喊到成頭汗, 聲都沙. 不過尋晚12點0個轉佢飲多左. 可能飽左小小.半夜0個次我早左起身,沖定奶,個衰仔又睡得好"林" . 結果我又要再沖過另一樽奶. 佢晚晚都整我一野,激死 !!

無覺好瞓

2008-06-06T18:00:00.003+08:00

尋晚比bb嚇親我. 夜晚餵完奶, 掃完風.bb都睡得好好. 我習慣望住佢一起睡. 大約15分鐘左右佢咀角有小小奶流出. 都係正常的.因為好多時佢食完奶個咀仔仲有小小奶.我無為意. 又過左成45分鐘. 佢好似醒左咁. 我就起身, 點知我一起身, 佢即刻嘔奶, 仲嘔到d奶0係個鼻度出埋. 如果我發現吾到.真係不堪設想. 都掃左風. 佢都 "放"左氣la. 都吾知點先夠. 咁我咪24小時吾洗瞓 ????!!!!

滿足

2008-06-04T14:34:00.003+08:00

睇bb書話小bb飲完奶,好多時會有一個滿足的笑容,不過我覺得呢個笑容好似好古域.好攪笑 !!

小燕開始同我湊bb. 放心哂. 如果吾係佢吾可以同我湊過夜. 我就吾洗請工人呀. 有小燕.我可以好放心咁去瞓. 養足精神夜晚湊bb. 雖然夜晚都幾辛苦,不過宜家起碼可以有老公陪. 心情都好番d !!

愛回家

2008-06-02T18:09:00.002+08:00

之前先講話番娘家,今日又番回自己家 ??!!
無錯.吾知點解小b睡得總係吾"林".好易醒同好易哭呀.吾知係環境吾同左.定係佢大個左.知道自己已經吾0係我個肚入面. 對身邊野敏感左.反應大左 !! 連哭都大聲左好多好多.聲都沙哂 !!
我同媽咪都比佢攪到睡吾好. 半夜我起身.媽咪又起.咁2個都醒哂,到第2朝咪2個都無精神low. 加上我真係吾可以同老公咁樣分開法.最後都係決定番屋企了 !!
從明天開始.小燕就幫我湊bb, 大約早上8點至4點.咁0個時老公都放工了.我就早上睡夠佢. 夜晚可以煮飯. 至到第2朝.係可能半夜bb會嘈小小, 不過老公話ok. 我寧願辛苦小小都吾想同老公分開呀.
所以..bb 你真係要乖d la. 吾係無人收留我地ca la !!

回娘家

2008-05-30T21:55:00.002+08:00

聽日會番媽咪度了. 因為老公要番工. 吾可以嘈住佢. 其實我真係好吾開心, 雖然老公放工都會上黎,不過始終吾係一起睡.見小好多時間呀. 又怕老公晚晚一個人好慘好悶. 我都話哂有媽咪,細佬呀. 為左咁我都cry 過幾次. 老公仲怕我有產後抑鬱呀 !!

呢幾日好在有小燕幫我. 佢教左我好多野呀. 同bb沖涼呀. 餵奶呀. 之前我餵bb飲奶10次有8次都嘔.我仲以為佢虾我. 原來跟本就係我抱bb個方法錯左. 摺住佢條頸.所以一郁就嘔奶. 原來要坐得好直. 攪到小b咁多日無啖好食. 我真係好內疚. 好在有小燕.我小b先有奶飲呀. 第時學講野.除左先講媽媽同daddy 之外.一定要先學講多謝燕燕"e" "e" 呀 ^_^

出世紙

2008-05-27T20:27:00.002+08:00

今日老公幫bb拎出世紙. 遇到一對夫婦.個男人好衰.話吾想張出世紙有佢個名. 又話要個bb跟媽咪姓都吾好跟佢姓. 雖然我吾知人地點解會咁,不過真係好替個女人吾抵. 同你生個bb咁辛苦.雖然最後個工作人員話政府吾可以咁.因為你地有結婚証明.一定要跟老豆姓. 不過老公話見到個女人好吾開心.

第2次body check

2008-05-24T17:13:00.005+08:00

吾知點解bb總係鍾意舉高2隻手仔瞓.整到手仔凍哂 !!

今日有媽咪陪我地去健康院.今次見醫生做了小小的body check. 今次重了小小,吾知同bb啱啱飲完3安士奶入去磅有無關係呢. 不過我地吾知要磅重,吾記得帶尿片. 除哂衫仔先知.小b又玩野. 一除即尿尿. 濕哂 !! 姑娘只有中碼片,都要用住先. 又一玩野之作 !!

bb開始大個.好似知道自己已出世,成日眼仔look look 望自己手仔. 好好奇咁. 夜晚又吾瞓.前晚攪到5點.我第一次同老公講:我頂吾順了.要瞓呀. 尋晚又1點玩到4點. 今晚又吾知點. 媽咪成日話日頭吾好比佢瞓. 佢要瞓咁點呀 !!!

bb 你快d大個d.介左夜奶.我地就舒服哂了 !!

小b body check

2008-05-22T12:38:00.003+08:00

尋日小燕同我去左健康院同bb做第一次的body check. 量體重呀. check 黃疸呀.安排幾時下次打針呀.又要安排我幾時做產後檢查呀. 好多日子要記.
bb體重比出世時輕了小小. 姑娘說這叫"收水" . 是正常的. 放心哂 ^_^
小燕幫bb餵奶.換片.我都學左好多野, 真係吾該哂.多謝哂 ^_^
小b到宜家都幾好湊,係03:00am要起身就辛苦d.吾知幾時可以介夜奶呢 !!

拆線

2008-05-19T20:56:00.006+08:00

今日09:00 am姑娘到了我屋企同我拆線,原來宜家吾洗0係醫院等, 可以叫姑娘上屋企拆,$80.

其實都吾係好痛,可能姑娘手勢好,好快已消毒完.拆完再整埋沙布,因為拆完有針頭,所以都係用沙布整好. 星期四就正式清哂所有野. 原來只係5針. 咁真係好細wor. 珍姨話佢0個時成10幾針, 我都無諗過咁細 !!!

今日奶奶同bb沖涼.我無陪呀,小睡了. 老公話佢又係一上水呵尿尿, 比佢玩謝 !! ^_^

今日同老公傾左好多關於bb野. 我地2個又吾識, 個個講野又吾同. 好煩. 睇0下有無人可以幫到我地...

1) 宜家醫院食緊心美力. 老公話佢成日一路飲奶一路呵便便,咁佢有無吸收到呢... 跟住我同佢講.0係醫院人地d bb仲多便便,你個仔小la. 吾係水同太硬就正常呀.不過佢當然吾信我.其實都係擔心.跟住奶奶0係舅父度拎左礶安嬰兒A+黎. 咁我地就會慢慢隔4次同佢轉. 直至轉哂A+為止. (舅父是醫生).

其實BB咁樣呵便便. 係咪吾吸收呢 ??

2) BB食奶次次都吾準時, 叫佢起身.佢又吾太願食. 等佢肚餓先餵又會吾會亂哂時間呢 ??

3) 我宜家吾補得. 又有小小傷風. 但媽咪又成日話我咩都吾補又吾得. 究竟我有咩吾食得呢. ??

其實仲有好多小問題. 都好煩惱呀 !!!

下水禮

2008-05-19T20:44:00.005+08:00

18/5. 今日雄舅父一家.英姨.珍姨黎左. 珍姨仲同bb沖涼. 嘩,真巴閉. 個個你一句我一句,呢個又話0係個廳沖,0個個又話毛巾得未. 衫仔ready 未, 沖涼液有未,個個影相,一個又用相檥,一個又用手機, 又要等埋. 我無份沖都流哂汗.好緊張咁. 又大叫捉緊呀,又話未洗邊度邊度. 一個字---嘈!!

bb係落水時哭了幾0下. 之後好似好enjoy咁. 不過一上水.... 呵尿. 件衫仔濕哂,又要揾新的換. 真玩野 !!!

出院了

2008-05-19T14:54:00.003+08:00

17/5 今朝醫生話可以出院了,不過bb有d面黃.我怕要照燈,因為對面床就係咁吾可以出院住 !!

另一個醫生同我地做最後body check. 睇傷口呀. 跟住就話可以叫人同我出院了. bb面不是太黃,等一出院打電話去健康院再同bb check.

等bb食完2點0個餐奶, 媽咪同jeffery. mr. chan. 芳姨就黎接我了.

bb 0係醫院就好易湊,好擔心番到屋企吾慣呀 !!

abby 姨送左衫仔比bb. so cute . thanks...

夜晚. 老公12點幾放工. 我11:30pm 餵奶, 我同佢講, 一陣見到daddy la. 你地都未試過咁近的接觸,daddy 好心急見你呀. 你要乖仔呀. 點知一講完, 佢眼仔look look. 平時飲完奶好攰好想睡. 今次無呀!! 老公好快番到黎, 同佢講左一陣野. 我抱佢睡, 佢0係度哭呀, 又吾係呵便便.都吾知佢想點. 又吾點同佢著衫.又怕凍,又怕佢熱. 攪左好耐. 餵多小小奶比佢就睡. oh. 係吾慣定咩事呢. 千萬吾好晚晚都係咁呀. 0係醫院好叻叻ca woh !!!

甩臍帶了..

2008-05-19T14:38:00.002+08:00

16/5 . 一早起身ready 湊bb,點知姑娘無推番bb比我. 10:00am.我地去左學沖涼. 超難 !!

上午姑娘同bb沖完涼後推番比我. 我發現床頭有臍帶, oh good good. 我仲好擔心沖涼時點攪. 宜家甩了. 舒服哂. 奶奶同珍姨話keep 住佢, bb仔無咁易肚痛 !! 紀念又好咩都好la.我都keep 起了.

中午又發生了笑料.bb飲緊奶時呵便便. 仲係好大聲bon bon 聲. 佢個咀仔吾郁.可能係用哂成身力便便,吾夠力飲奶了,我拎開支奶,我話:你咁攪笑呀,一路飲奶一路呵屎屎呀,一陣媽咪要換片片呀,咁衰呀. 佢又0係度笑呀,笑到咪哂眼咁 !! 真係咩痛都吾記得哂 !!!

姑娘話有d bb係好難掃風. 吾知係我問題定bb真係難掃呢. 大把野要學 !!!

夜晚bb無推入房0係我身邊, 其他bb仍然哭.我個衰b仍然同佢老豆一樣--- 睬你都傻 !!!

比bb玩呀..

2008-05-19T13:56:00.003+08:00

呢張相係番到屋企先影,因為醫院吾比影呀,細佬佢地偷影, 不過我無帶相機,番到屋企先慢慢影.

15/5. 今日比bb玩到暈..

今日同佢換片時打開尿片.竟然尿尿呀....佢成面都係.衫仔床單濕哂!! 我噤鐘叫姑娘,佢只係叫我同佢換衫.0係邊度拎新衫,我夠知la.又吾幫手!! 又怕佢凍親,無從入手呀.攪左好耐,佢又整多次.oh....

人地已食完奶,我先開始餵,佢好野呀,都只係哭了幾0下.跟住look大隻眼望住我.又無表情.好似好嬲咁.我話吾關我事呀,你自己整濕哂,吾好嬲我呀,佢笑wor.雖然佢吾知我講咩,但佢無la la 笑,真係吹賬 !!

我仍然吾係好識掃風.唯有打斜佢睡,怕佢嘔奶呀.

我開始有鼻水,帶了mask呀,好怕病呀 !!

夜晚d bb係咁哭,嘩. 交響樂咁.我同姑娘講我有鼻水,可吾可以推番入bb房,我怕傳染比bb. 佢話入面好多bb,再等一陣.

03:00am. 姑娘叫我地起身餵奶.我凍到成個人震.同姑娘講我暈. 真係餵吾到bb.之後佢地先推入去,我先安心去睡了.

我生了一個cool man ??!!

2008-05-19T13:37:00.002+08:00

14/5. 今朝bb被推到我身邊. 我先好清楚望0下佢個樣. 好似老豆.大眼仔.大鼻大口.仲係一個cool man. 別的bb成日cry, 一個哭個個一起哭.大合唱一樣.只有我呢個衰仔照睡, 打左支針,都只係哭了2 0下又收聲. bb:如果日後你都係咁堅強我就放心哂了.

今日姑娘同我除去尿喉,鹽水喉,所以吾會再有姑娘幫我去洗手間, 一定要落床,之前daisy已同我講,落床0個0下係最痛, 係呀, 係超痛 !! 仲有身體入面d腸開始郁,成日姑姑聲,都有小小痛.反而傷口開始吾太痛了. 可能係d膠布膠紙痴住d肉痛. 不過無法,個個都話一定要落床行多d.咁先快好, 好多女人都吾上番張床,就係因為怕落床. ha ha..

中午舅父亞婆都黎左.老公見人地做手術好快出黎,我就好耐.好worry,不過好彩咁arm明舅父打比媽咪,話係要等麻醉葯散,佢地先安心.

今日老公帶了束花黎.我咁辛苦生個仔先換來一束花.佢都好著數呀 !!

不過聽日佢要番工,吾可以黎陪我了 !!!

出世了

2008-05-19T00:30:00.005+08:00

13/5 2008 12:20pm. 6磅1. bb出世了...

12/5 20:00pm.入了院做最後body check.抽血.聽bb心跳,最後一晚bb在我的肚內了.10個月過去了.bb明天就要自己呼吸了. ...

13/5 .今日有4個人開刀.我問左醫生我係第幾個,佢話吾知.不過我隔離個女人話佢係第3個.我當然吾想係最後,一黎尋晚開始吾可以食野,好肚餓.2黎真係好心急bb要出來.3黎佢個頭仔頂住我個心好吾舒服,已好耐無睡了. 好攰呀.

06:30am.我隔離個女人叫我快d沖涼,因為宜家吾沖,醫生突然叫你落去生,你就成個week吾洗沖涼,我梗係即刻去la.
08:30am. 姑娘叫左其中一個女人落去.我地3個就好緊張了.邊個係第2個呢,如果我隔離0個個真係第3,咁吾係第2咪即係最尾 ??!! 最尾0個個可能要到下午先生得呀..
10:00am. 姑娘叫左我隔離0個個女人ready.呀,佢又話自己係第3 !! 個半小時一個,即係11:30am就有結果了.
11:30am. 果然, 姑娘叫我名呀, 之前醫生話可以叫老公陪,不過最後姑娘話開刀吾得.好驚呀,我比人推左出走廊,好多人0係度等.老公都0係度. 10分鐘左右.我比人推到6/F. 入到房,好多人.大學生呀,姑娘.醫生,個個好busy.人人都做吾同野,有人同我抽血.有人同我整喉,量血壓,又比左一杯不明野我飲,話係中和胃酸,超難飲,不過衰d講,0個時佢叫係食"c"都要la !! 最後佢要我曲埋身,0係我背度打了麻醉劑.開始個人好吾舒服,血壓仲低左好多. 之間成身吾郁得.雖然feel到佢地0係我身上整野,不過無feeling. 跟住有2個大學生同我做問卷,仲邊有心機呀.真煩 !! . 過左一陣, 2個醫生同時話,出世時間12:20. oh.有人抱出了bb.抹左身,拎bb比我睇, 0個一刻自己好感動,不過無cry.有小小眼睛發熱0個種. 小b仔就咁就出來了.

麻醉葯令我好吾舒服.想嘔, 姑娘比野我吸.之後無事了. 推左我去另一間房等葯力散左先可以上房.直到14:45pm.老公,屋企人同奶奶佢地0係門口等緊了.
葯力開始散.傷口都開始痛了. 今晚本身想好好的睡, 隔離床的女人成晚叫姑娘,又話痛又話呢樣0個樣.結果我都係睡吾好 !!!

四川救災

2008-05-17T20:59:00.002+08:00

我回來了. 不過第一時間吾係報導我同bb的消息, 係想大家一起救災.因為0係醫院無咩時間睇電視.只係好basis知道四川有地震,番到黎睇電視報紙先知咁多人死傷. 之前講到我個小b未出世已有利是,我咪話想捐左佢.不過又吾知捐去邊嘅.今次就比bb第一次做善事了. 做左會身體健康呀,你地仲等咩呀. 好簡單,打電話去聯合國兒童基金. 電話28336139. 只要比credit card number. 你個名,card holder name. card expired date, 你地址.佢地仲會寄收據比你, 吾怕比人呃呀.

同你身邊朋友講呀, 希望幫到幾多就幾多la ^_^

BLUE BERRY MUFFIN

2008-05-10T15:42:00.002+08:00

第一次用新鮮BLUEBERRY 做MUFFIN. 可能我太貪心,落左好多藍莓.入面都係藍色的.HA HA,不過好好味. 一出爐食左2個. 一陣再食. 我係用左ALICE0209的食譜, 佢成日整MUFFIN. 我食過其中一種,好好味ca. 想跟佢食譜整好耐,一路都無買blueberry. 原來真係好味過用blueberry jam 整, thank you alice0209 ^_^

入院準備

2008-05-10T06:24:00.002+08:00

尋日9/5 約左早上8點入醫院見醫生同麻醉師, 點知佢比左入院衫我,話吾知要等幾耐. 好彩叫老公番屋企先. 成日攪到4點先走得 !!
先係驗尿.之後已開始等, 已睡著了.到11點幾,有姑娘叫起身聽bb心跳. 之後又睡,12點左右,又起身食飯. 又睡. 有個麻醉師到了. 講解全身同半身有咩分別. 原來宜家係做半身,我話咁咪見到你地0係度做咩low.佢話吾怕,因為都好快手. 同埋老公可以入埋去,不過都要睇當時情況.. 之後又等, 到見醫生,先照超升波. 講解開刀有咩吾好處. 之後又等左一陣就走得. 星期一夜晚就要入院了.
期間我見到好多孕婦都要生,有d不停叫痛,有一個過了40週都無動靜,有一個只有21歲,已流了水不過又吾痛, d姑娘見你吾痛都吾理你. 我見有一個痛左好耐, 跟住見紅, 流埋水先推佢落去生, 佢地話咁快落去都無用, 都未夠10度,..... 嘩,真係好緊張呀 !!

好想睡..

2008-05-07T22:00:00.002+08:00

當你的肚皮去到40幾吋. 向左睡或者向右睡都吾會好. 好怕整到個肚, 又好快會腳痺. 這感覺呢幾晚越見嚴重.只可以睡2小時左右,因為真係好攰好攰, 當2小時過了. 一清醒就再睡不了, 好辛苦 !!!

這鈣片是私家醫生提意我食的. 時間過得真快. 只有5粒就食哂了, 我成日專登吾去數仲有幾粒,成日諗一食完就係生仔之日. 不過淨番的實在太小, 一倒出黎就倒哂. 仲有5粒. 日子都幾準喎^_^

椰汁紅豆糕

2008-05-04T22:20:00.002+08:00

今日放假. 整左呢個紅豆糕, 係跟書整的, 材料有魚膠粉, 不過我都見過有d食譜無用, 雖然係好好咪,不過用成10克魚膠粉好似好多咁, 下次嘗試0下其他食譜先 ^_^

是否太多了 ??

2008-05-02T21:48:00.002+08:00

早幾日開始洗bb的衫. 毛巾. 就算是新買的,媽咪話都要洗一洗. 才發現買了很多大,小毛巾, 沙巾.手巾仔. 仲有朋友比的衫仔,有的未著過, 很新淨的. 很多很多, 現在只洗了一部份較新淨或是未用過的先, 仍有幾大袋呀, 真多謝各親朋好友. 小b一定會親自say thank you ^_^

早2日daisy 同佢個仔到我公司找我, daisy 都有左5個月了, 佢有左個大仔同今次個bb都係一次都無嘔過, 真好野. 仲有我都發現仲有一個同事都有了. 嘩. 今年好多人做媽咪呀. 好開心呀..

孕婦糖水

2008-05-01T20:59:00.002+08:00

今日媽咪煲左白連鬚糖水比我飲. 人人都說差不多生,就要飲這糖水. 聽就聽得多.原來係黑媽媽的. 不過吾係苦, 話哂都係糖水,有小小味. 飲了2碗, 即刻肚痛, 我諗係咁橋遮.都未消化la.不過得自己0係屋企, 都係小心為上 !!

講開呢個糖水. 材料係白連鬚3錢.蛋一隻, 冰糖小量. 先把白蓮鬚同蛋洗淨, 之後加凍水一起落, 水滾就落冰糖, 改文火煲半小時, 3碗水煲成一碗.

功效 : 有固澀作用, 即止血 . 補腎, 消熱毒之效. 令生產過程順利. 解胎毒. 不過要0係臨盆之前15日至1個月先可以飲. 一星期可飲1至2次. 始終係糖水.飲太多都吾好 !!

不過媽咪係咪用呢個份量.我無問, 反正佢一定吾會錯.

決定了..

2008-04-30T22:19:00.002+08:00

今日到了醫院見醫生, 講解過推肚同開刀的分別後, 我同老公決定開刀, 9/5 入院見醫生, 做最後檢查吧. 13/5早上開刀. 醫生當然想我地推肚,不過反正2種都有危險性. 我吾想0係佢地推肚期間令我作動, 仲危險. 我選擇開刀. 媽咪問可吾可以選擇時神. 當然無la.反正我都吾信呢d野. 得啖笑 ^_^
不過如果bb0係呢幾日又掉到頭向下, 咁醫院就吾會同我開刀了... 其實. 我都寧願開刀. 我真係怕自己頂吾到0個10幾個小時的痛楚 !!
希望一切順利 . ^_^

好緊張呀....

2008-04-29T17:17:00.002+08:00

今日又到健康院body check,見到一男人很緊張他的太太.個孕婦去到邊個老公就跟到邊, 心諗.洗吾洗呀. 之後我入了房等姑娘摸肚,個孕婦入左黎,個姑娘話比佢先呀, 佢肚痛,原來個孕婦今朝開始肚痛,星期日已有小小見紅. 姑娘叫佢即時入院,突然間好緊張咁, 過左一陣,有3個救護人員已到了, 相信佢地係入院了. 我估佢都仲要等一段時候先生得呀, 佢好似吾係好想入院咁 !! 點都好,希望佢生番個健康bb la.

我知道孕婦因為荷爾蒙影響,會有好多分泌物, 今日我同姑娘講,呢2日好似多了一點,佢竟然話可能係穿洋水先兆,嘩!吾好嚇我呀,我未有心理準備呀. 經過佢check 左一陣,好彩吾係. 同番老公講,佢話,你都係時候ready la. 有咩時打比我, 吾洗怕, 嘩. 我見頭先個女人咁樣, 吾驚就假 !!!

最後倒數

2008-04-25T21:51:00.003+08:00

一個月後的今日, 我會是媽媽嗎! 預產期是5月25日.應該會早一點吧,好多人話仔多數早的. 腰..已去到42吋.點減 !! 磅數...150磅.點減 !! 上星期見了姑娘,仔仔仍不轉身, 已約了下星期三入醫院見醫生, 最後打算, 開刀 ??!!

朋友sue sue 同佢老公尋日帶來了6包尿片.其實係我地一大班同事送比佢個仔,不過人仔的確大得快. 未用哂已經要改中碼, 咁細碼就留比我仔仔la.仲有好多新衫未著過,嘩,真係咩都吾洗買 !! 基本上日用品都買好了. 番多10幾日開始放假. 只等bb出來了..

超好味蛋撻

2008-04-22T18:34:00.003+08:00

先要多謝elaine 的食譜同教導,我整過好多次蛋撻, 雞批之類的批皮,真係呢個最好, 吾知係咪我之前一直都係用牛油+麵粉用手打,打至淡黃色咁. 原來elaine話吾洗, 只要用凍牛油+麵粉用手整至好似麵包糠咁就得了, 果然好鬆化, 多謝elaine..

雖然個蛋糊有小小泡,不過一d都吾影響個味, good good ^_^

反轉再反轉

2008-04-15T19:55:00.002+08:00

今日去私家醫生度body check. 竟然照到你個調皮仔又反轉左身!! 早一個月check.你頭仔已向下了.做咩今日你又走番上去 !! 醫生話可能佢細,仲有位比佢走黎走去.我話係咪我睡覺時成日左右郁呀.佢都話吾關事. 之後去左健康院, 同左姑娘講. 佢再同我摸肚. 佢都話係呀.bb個頭仔0係上面.姑娘話下個星期如果再係咁. 就要番醫院見醫生,睇0下有咩方法. 之前有個女仔又係咁, 就2個醫生一路睇住超升波一路推番個bb頭仔向下,不過聽番個女仔講就話都幾痛, 一係就要開刀生wor.
同左老公講,老公同我意見都係吾想推, 始終0係入面,都吾知咩事. 佢仲安慰我: 仲好la.開刀無咁痛.好過陣痛吾知痛幾耐.. 想想0下. 其實點都好, 你0係入面我咩都做吾到, 你一定要生生性性.平平安安咁出黎呀..

真的不易

2008-04-10T14:21:00.003+08:00

早2日見報說張偉健太太的bb流產了,心裡很不安,不舒服,聽說bb已8個月了,如果早一點出來都無問題吧,雖然吾知係咩原因,不過自己又擔心了.當bb吾郁又怕,郁得太利害又吾知咩事. 如果養一個小孩要400萬好難.相信生一個小孩更難.
網友winnievv之前0係個blog度都有講. 我都好有同感.
好多朋友都送禮物比bb. 到時bb一定要多謝咁多位呀.

改名..

2008-03-30T11:23:00.002+08:00

從有bb開始, 以為係女的.老公同我就成日叫佢做"何冷豆". 因為老公姓何. 老公成日叫佢豆豆. 不過一知佢係男仔.老公又諗左好多怪名. 何文田呀,河童呀, 河馬呀. 總吾去好好的諗0下叫咩名. 有一日,我想到好多單字, 本來,我地想改單字,不過發覺仲難改, 結果我比左一堆字老公, 有 : 希 . 柏 . 仁 . 韋. 熙 . 立 . 好多好多, 不過都係定吾到! 到英文名,老公第一個字係M字, 佢送比我的第一份禮物又係MICKEY MOUSE.又係M字.我成日話MICKEY係大仔,咁細佬個英文名都係M字頭. 無la la. 老公又提到早排電影成日出現MARTIN & MARK 的英文名,我話好普通,佢就諗D吾普通, 竟然係
" Mc donald " . 一係女就Mc donna. 再生就 Mc 旋風wor.聽到我一頭煙,就咩叫哂姓麥呀,老公話,咩呀.麥當奴英文吾係M字行先咩 .......

呢個真係衰老豆 !!

懷孕倒數期

2008-03-27T14:57:00.003+08:00

2008年3月2日. 今日個肚已去到41吋了.我都肥左30磅,吾知有幾多磅係bb的. 不過太肥都吾好, 我怕會好辛苦. bb: 你出黎時一定要順利, 快.令我痛小d就好low. ^_^

2008年3月25日. 32週了.仲有8個星期bb就出黎了. 今日終於決定邊個湊bb了.就係早上我朋友小燕湊, 夜晚就媽咪湊. 當然頭2個月都係我自己湊番. 早2日明舅父比左好多衫仔,車,床我地. 宜家仲有小小日用品未買. 我都決定盡量餵人奶.希望bb可以食到. 始終人奶係最好.

早2日同左2個網友alice & winnie 出去high tea. alice 仲送左禮物比bb.真係多謝哂, 等bb大個一定會親自say thank you la.

懷孕篇--5個多月了..

2008-03-27T14:46:00.002+08:00

2008年2月11日, 初5.我無再咳了,不過天氣仍然好凍,要小心d. 今日去左食婆婆的生日飯,竟然有人比利是bb, 雖然吾多, (因為我話佢未出黎吾洗比).不過我想做一點善事, 比邊個機構好呢 ??!!
bb開始郁多左,連老公都feel 到. 好神奇呀..
2008年2月19日.今日個肚好痛,痛到郁吾到. 我好辛苦先行到入房,痛到無感覺,睡著了.
2008年2月20日.去左睇醫生, 佢話無事, 可能bb轉身,整到你入面d心.肝,脾,咩都亂哂low.嘩,咁可怕 ??!! 不過bb郁得好好, 就放心了..

懷孕中期了

2008-03-27T14:30:00.002+08:00

2008年1月28日. 尋晚肚痛了成晚,好擔心.0係公司嘔左2次, 已無嘔好耐了.吾知咩事.下午去了睇醫生. 原來我腸有菌.可能之前感冒未清.吾可以飲奶,oh.今朝仲飲左朱古力奶..!! 照左超升波,見到BB,個心都定左.呢2日要食粥清腸胃. 我要快D好番呀. 就快過年了...
從書本上得知. 22-26周,BB開始可以張開眼睛,開始呼吸.對聲音都有反應, 吾怪得有時電視好大聲.你都踢得大力D, 老公有時彈琴,不過佢都係玩玩0下. 有時同BB講野. 特別係我虾完佢, 佢就同BB講, 你媽咪又虾我la..唉.教壞哂 !!

已懷孕21週了

2008-03-27T14:11:00.002+08:00

2008年1月7日.今日又去醫院照超升波,今日媽咪同老公有同我去.今次好清楚見到哂bb個樣,手指仔,腳指仔,眼耳口,不過最意外係睇到.....你2隻腳仔一間多左d野wor...醫生話係仔呀 ????!!!
你腳仔郁郁好得意.不過今次醫生無比相我.佢要keep住番底.老公超開心.本身我地已想到個女仔名,宜家又要諗過. 男仔名好似難改d. 到我今次有小小失望,不過好快,我又無再諗了. 仔女都係自己,只要佢叻叻,吾好令我嘔,就乖仔了.
2008年1月12日. bb郁多左. 我已開始feel到. 我個肚已37吋了.好大呀.
2008年1月14日. 喉嚨開始吾係好舒服,條腰同個pat pat 好痛,我諗我病了...
中午去左睇醫生.bb踢到我好大力,好似0係入面踢波咁, 係咪好不滿我食葯呀, 醫生話傷風葯吾會對bb有影響, 吾洗怕..
2008年1月25日.病左成個星期,無好過,因為葯吾可以太強.只可慢慢醫.好辛苦.我食葯又怕bb都食埋一份.吾食又吾好.點好 !!!

懷孕篇--4個月了.

2008-03-27T14:01:00.002+08:00

2007年12月14日,今日去私家診所睇,老公都有陪我.不過我好攰,等的時間我睡著了.姑娘一叫我名,我成個跳起,入到去,醫生問我最後經期係幾時,我都未睡醒,答左5月17号,醫生話咁你咪有左7個月,點解個肚咁細 !! oh.我答錯左呀..佢問我知吾知個bb係男定女.想吾想知,我梗係想知.佢照左好耐.話揾吾到男性生殖器,多數係女仔呀,我好開心,不過老公就吾多開心了.佢鍾意仔呀. 走的時候,我問老公, 係咪好吾開心,佢話有小小,不過無所謂呀,仔女都一樣.
醫生話我過肥,吾好再食奶粉,食維他命丸好d,梗係la.我又怕bb吾夠營養,一吾嘔,食到野就係咁食, 我肥小小第時可以減呀.最緊要bb肥肥白白,健康呀 ^_^

懷孕篇--身體好似好了點...

2008-03-27T13:50:00.004+08:00

2007年11月17日.今日又嘔,雖然嘔我過程吾太辛苦 ,一望到個厠所已嘔得出,無咩頂住,不過bb你幾時先同我的生理近d,我地可以互相適應,我就吾洗咁辛苦了...

2007年11日25日.呢排都要醫院,健康院2邊check.好攰呀.不過聽到你心跳,知道一切正常,放心哂..

老公要我飲奶粉,我自小好憎奶味,何況是沖粉,奶味好濃.不過老公買了一大袋飲筒,我個鼻又嗅吾到奶味,好d,不過,為左bb.都要飲呀.....

懷孕篇-- 3個月了

2008-03-27T13:43:00.003+08:00

2007年11月2日.第一次去醫院,第一次聽到bb心跳,好得意,心跳得好快.好奇妙呀.
2007年11月12日.同老公一起去醫院照超升波.第一次見到bb, bb腳仔高舉了. 手呀頭仔呀都好清楚,再次聽到bb心跳.醫生影左好多張相,我會好好番下.日後bb睇番自己個樣.一定好好笑..

懷孕篇-- 發現有左bb

2008-03-27T13:06:00.003+08:00

2007年8月19-26日,是最後一次的經期.9月無黎.10月頭.身體開始出現變化.開始成日暈,無胃口.我自己買了驗孕棒驗.真的有了.我無同老公講.只係話今晚講個秘密佢知,佢話,你有秘密呀,係咪整爛左屋企個電視機呀.!!! 佢總係諗我破壞野.我話你今晚咪知low.0個日,佢收早,已發現了垃圾桶有棒棒的盒,佢好開心.不過我就擔心多d,無太大feeling,之後幾星期.身體仍然很壞,無胃口,開始想嘔又嘔吾到.頂住頂住咁.好辛苦.成日喊,瞓吾到,甚至想到放棄,媽咪見我成個人吾同哂,問我咩事,我先講我有左, 結果佢成日煲湯比我,我都請左4日假,0係屋企休息....

產前抑鬱症

2008-03-13T16:32:00.004+08:00

呢幾日....超吾開心....
由懷孕開始,我同老公都為左邊個湊bb而不歡而散好多次.次次都無結論,次次都話:吾好講呀 !!
我當然想我媽咪湊.我同公司講要掉入沙田都係因為可以日日見到bb.老公就認為比奶奶湊好d.起碼佢地0個邊有老爺奶奶2個人.一個去買野,都有另一個人睇住.
我的想法係 :
1) 我懷胎10月. 要介口,瞓吾好,無得去玩,要嘔,又暈.呢d你一樣野都吾洗"受" . 我生bb都係因為你成日要求. 我係為左你. 宜家. 我只係一個要求. 請個工人陪住媽咪一起湊bb, 你就發哂脾氣, 話要用$都吾比奶奶湊, 講吾通....
2) 老爺身體吾好.成日要出入醫院, 18/3又話做手術. 奶奶年齡仲老過我媽咪. 我點放心.
3) 我都係想日日可以見到bb啫. 吾通你真係忍心可以一個星期先見一日 ??!!
４）始於老爺都係一個病人．我真係吾想咁細的bb成日同個病人一起生活．
老公想法係 :
1) 奶奶湊大佢地4個都得, 有咩吾得. ( 但這已是30幾年前的事呀).
2) 佢屋企有2個人. 如果佢老豆要去body check. 可以叫佢細佬睇住. ( 我對佢細佬無好感）
３）奶奶的想法超奇怪．佢屋企無洗潔精．洗野只會用熱水，咁先夠clean woh. 點得呀．．．
４）為左吾浪費．出街用尿片，屋企用尿布，佢自己洗woh....

一d常識都無．以前無咁多細菌，宜家都吾同哂la.講奶奶壞話我又吾想．但點忍呀．

我已經無同老公講野２日了．我真係好吾開心．個仔係自己嘅，咁都無得話事．．

萬千愛在一身

2008-03-08T22:06:00.002+08:00

早幾日.我要去T.S.T的某廣場大廈.老公就教我去. 我話,OH.即係加連威老道頭.有PIZZA HUT0個度呀.佢又怕吾係. 又教我另一個方向去. 其實我已肯定了地點,反正TST吾係好大.咪問人LOW. 老公0個日要番工.我坐佢車出去.我去到目的地做好野.佢先落車,我話我可以坐番佢車番屋企. 佢奇怪點解我揾到仲要咁快手.我話,我吾係低B.佢話,不過你0係我心入面係蠢LOW !!!

另一件事. 媽咪呢排成日提早煮飯,到7點拎飯去我公司比我番屋企食,因為老公番夜我就只會出街食OR煮公仔麵. 不過有一日中午佢都黎,其實我0係公司叫外共賣都係呢D,我真係吾想佢太辛勞.老公成日話, 睇吾出你媽咪咁錫你. 今日. 佢又打黎要我一定要帶FACE MASK. 因為我公司部LIFT好多人..

呢2個人0係我生命入面都係最重要. 只係一句說話,我已經開心好耐. 細佬仲細(其實都吾細了,不過0係家姐心目中佢永遠都係小朋友仔).佢仲係認為媽咪好煩好"E""E" 哦哦. 到佢大D.佢就會好珍惜呢D說話.

今日.因公事上要揾人幫手,結果要揾到以前的上司,不過我講到一半,我FEEL到佢的冷漠.我無再講落去了. 都黎吾切吾開心,我要急於揾其他人幫手, 比起從前,我一定好吾開心.

黃昏時. 有個客同我講, 你做咩吾用FACE MASK.我話做緊野帶,D客都吾黎LA.不過我放工坐車有用. 只係一句關心說話, 我又記到宜家..好WARM ^_^

我吾需要個個都對我好好. 有屋企人,我已好心足. 媽咪聽日去旅行玩幾日, 我又提佢小心呀. 雖然好簡單的一個問候電話,但媽咪都係笑笑口的. 我以前吾會做呢D野. 宜家我都要學習.媽咪玩多2個月左右就要湊孫,無咁FREE ca la. ha ha..

朋友們, 流感高峰期呀,你地都要小心身體呀.

格仔曲奇

2008-03-02T18:52:00.002+08:00

呢個cookies用左成舊牛油, 食譜係分開3份,一份牛油, 一份綠茶粉(我改左可可粉).另一份係包住for外圍的,不過其實吾整外圍好似靚d. 以前我整cookies都係用底筋粉同沙糖,今次用左中筋同糖霜.係鬆化d wor.下次記住都係咁先 ^_^

祝婆婆生日快樂

2008-02-17T00:01:00.003+08:00

http://www.rthk.org.hk/rthk/radio2/myheart/20080212.html

婆婆已80幾歲.年年我地都會0係kowloon 食這餐生日+拜年飯,婆婆有9個仔女,18個孫.計埋女婿,新抱就要3圍枱.我地就會包起一間房.今年其中一個表妹仲打電話上電台同婆婆祝壽.(佢成日打去電台). 年年我地都會玩抽cash game. 一人$20 . 不過大熱門都係ma on shan 珍姨同天水圍清姨,佢2家人去邊度玩呢個game都一定中.我哥同我結婚呀.上年同今年婆婆生日. 都係佢2個中.邊有人咁好抽獎運ca.... 激氣 !!!

好耐無見我的朋友仔,你地仲認吾認得我呀. 我已經吾同哂樣la..... ha ha ha...

虎皮朱古力卷

2008-02-13T21:42:00.007+08:00

先整好個捲蛋先. 入面係朱古力cream.本身想整朱古力蛋糕,入焗爐先發覺無用可可粉 !!!

呢個"文"我都整吾好,吾夠平均呀..

呢張相吾係我影得差,係我整個"文"差, 吾平均所以吾靚...

連切都切得差,好彩吾睇得都食得...

今日係大年初七,人日.個個都生日.咁我就整個ugly cake 當做birthday cake la ^_^.

其實尋日已做了虎皮,不過衰左.其實今日整呢個都係吾成功. 不過個皮要4個蛋黃,心都痛呀,d蛋白就咁就無用.又吾想整多個蛋白蛋糕wor... . 下次吾好咁心急捲,個皮真係好難整,切又切吾齊, 不過吾係送比人,無所謂la....

新一年...2008..

2008-02-05T11:03:00.000+08:00

好像很多日無放假. 其實吾係. 只係一直病. 一放假只0係張床上.咩都吾做.. 天氣太冷.只有10度左右. 之前傷風好了.又咳. 咳好了又氣管炎. 最慘係醫生話我吾可以食氣管炎葯 !!!
今日"的"起心肝一定要離開張床. 才驚覺老公個衣櫃為何仲有夏天的制服.全都是夏天衣服!!!
老公呢6個月做左好多野. 煮飯.洗碗.掃地吸塵.洗衣機洗完衣服就掛起.照顧我起居飲食.仲煲粥.就係咁... 佢自己0個d野就無人理..!!!
不過仲要你做多幾個月工人先. 我就比你好好休息.做皇帝la ^_^
新一年. 希望身體強一點.身邊屋企人同朋友都一樣.健康真係好重要呀.

HAPPY NEW YEAR..

杏仁tart

2008-01-06T16:59:00.000+08:00

想整呢個tart好耐,不過身體吾好,無入kitchen,今日見好d,忍吾住整,不過個底好厚,樣衰衰咁.ha ha.

另外我0係yahoo整左個blog.不過好多野吾識加,希望好快會有個新blog同大家見面 !!

愛一個人

2008-01-04T22:22:00.000+08:00

有線22台有個節目叫--驚險大挑戰 amazing race.有亞洲版.外國版.今個月做緊亞洲版.其實係有10pair人,當中可能係朋友,兄妹,父女.. . 好多round 比賽,每一次都會out最後到終點的一pair.最後勝利的一pair有好多 $ . 我鍾意睇係因為睇到好多人性. 我想講嘅係,今集有pair結了13年婚的菲律賓兩公婆. 女的是一個無禮貌無儀態的一個肥婆,男的樣貌不錯,黑黑的,高大的,不過個女的成日鬧個老公,咩都鬧,去到一個国家吾識路睇map又鬧,佢自己玩吾到個game又話個老公揀錯,(其實係佢自己揀).玩吾夠一陣又話放棄. 總之影住佢兩個,就只係個老公比人鬧緊, 個老公已喊過好多次. 尋日0個集,佢地又係咁.個老公0係鏡頭前話我忍吾住了,成日比佢鬧,就黎crazy 了. 個老婆仲話,佢吾係鬧,只係大聲講野. 個老公個樣好慘,不停流淚,講吾到野... 我問老公, 點解會咁,點解仲忍佢, 我係女仔都睇吾過眼, 個男人永遠抬吾起頭做人,點解.

愛一個人吾係咁. 日日都吾開心.做咩要一同生活. 係要包容,但吾係縱容.
我自問都吾係好脾氣,不過近年真係收哂火, 尤其0係老公朋友,屋企人之間,我一定係小鳥咁,扮又好咩都好, 總不能黑面, 點都要比面個男人. 呢點老公成日話我做得好. 其實...我都係幾傳統女性ca.. ha ha..

2008 年. 我要做一個善解人意的太太同一個溫柔的媽媽 ^_^
仲有. 2008年我會起另一個blog.其實想整好耐, 無恆心 .希望真係做到. !!

祝大家0係新的一年,2008年日日都開心,同另一半相處甜蜜,同屋企人關係更親密.

2007之聖誔很快樂

2007-12-26T22:47:00.000+08:00

人越大.就不像以前喜歡人多地方. 今年25,26/12 2日老公同我都吾洗番工,不過我地都諗吾到去邊.25/12 一早食完早餐.就諗住去睇電影,不過電話訂票條線太busy入吾到.決定5點先出去買明天的票.行一陣再番媽咪度食飯.點知老公話我好耐無彈琴比佢聽,咪彈low.點知佢話想學.當然佢只用右手,不過吾係彈,係篤,好似打鼓咁2隻手指篤.佢話要"彈"張国榮的今生今世我聽,過程超好笑,佢吾肯學音符,只學1,2,3,4 咁篤,都幾似樣的,haha.不過佢有一樣野好好,佢彈極都彈吾好0個句,就不停彈0個句,吾會"飛"左就算.比我可能放棄了.仲有,我問佢就彈啱音不過仍然係咁彈0個句,佢話吾順wor..好服佢呀. 我等你呀. ( 呢個已經係我的christmas gift la ). 之後番左媽咪度,有靓湯飲呀.就咁就過左一個好好笑又好平淡的聖誔.
今日26/12 . 睇完蜜蜂電影,去左食壽司.雖然我吾食得生冷野,咪食太卷.加州卷low.已經好心滿意足了.之後去supermarket 買野煮飯.有老公鍾意的牛排.

仲有成隻雞,焗到arm arm 好, 好滑,老公差不多食哂. so happy ^_^

栗子小蛋糕

2007-12-13T15:44:00.000+08:00

好耐無入kitchen,老公問,做咩咁耐吾整野食,我話吾想洗呀,整一次野要洗好多野,佢話:你咪整low.我洗呀.就係咁,我就整左呢個栗子蛋糕仔,不過我肯定,用炒的栗子會香好多 !!!

親情

2007-11-16T20:50:00.000+08:00

今朝看到一單新聞,是一個15歲的女仔因為家人吾比佢拍拖,佢竟然咬傷daddy. 用熱水壺打傷媽咪.嘩, 真係好過份.IT'S CRAZY !! 諗番我地細個,我地3兄弟姐妹做錯事.雖然老豆吾打,不過就要我地跪地主,無得食飯,跪0係地下啱啱好一尺咁.郁都吾夠擔郁. 直至媽咪同我地求情成功呀.老豆嬲完呀.或者老豆扮入房瞓 (佢邊有咁早瞓呀),我地先起身. 再吾係比媽咪用三角衣架打.最多咪縮,邊會走呀跑呀,間屋有幾千尺咩,你都走吾到去邊la.都係受刑la.邊有好似宜家d人又話自殺又話還手呀...

呢個星期掉左番沙田做野, lunch 可以同老公食. 夜晚媽咪又黎同我食,好開心. 好耐未試過7:20pm番到屋企. 不過老公"炸"形.話我收咁早都係咁早瞓,係呀,攰呀ma..

老公每晚都會攪到我笑哂先去瞓,早幾日,佢"meet"個橙我食,我一見到d橙肉,就話:一睇就知吾甜la. 都無汁. 佢話:你呀.吾好只係睇外表. 你吾比佢好有內涵咩, 就算係吾好,你應該鼓勵佢,安撫佢,而吾係一野打沉佢,你睇佢,宜家無哂心機la! 我話,咁係呀ma.佢係好呀,你成手都係汁la. 有好多時睇外表就知佢點la. 老公話. 咁我夠無外表la. 我不嬲都吾係sell 樣ca. 我咪就係世界上對你最好0個個男人先.. 咁又係嘅,我又輸左tim !!!

心甜

2007-11-06T13:32:00.000+08:00

無去睇sammi 演唱會,無睇joey+草蜢903演唱會,有d後悔.知道出左碟已即刻去租.租左2個星期都係話比人租左.老公話不如買la.嘩,百幾蚊買隻我咩歌都有嘅碟吾係好抵wor.佢話,你以前諗都吾諗就買左la.係呀,宜家好慳呀.佢話,買la,抵呀..相信0係其他人睇落,真係好普通的對話,但吾知點解.0個一刻,好開心...

看完sammi演唱會, 好開心. 亦有無奈. 見佢咁成功, 當然替佢開心.不過我同老公都認為,佢吾洗做la.快d同安仔結婚咪好low.無日食得飽.精神壓力又大,為咩呢...

忘掉十月

2007-11-03T21:35:00.000+08:00

2007年10月係我最辛苦,笑得最少的一個月.老公說好耐無見我笑過.係呀.好病呀.希望11月開始好番..不過尋日去左抽血,都要比姑娘抽到腫哂.瘀哂!! 前日去左書店買左3本書,整麵包整蛋糕的. 湯水書呀咁. 好耐無買過咁多書.心諗自己都幾有文化..ha ha ha..其實只係好普通的書,不過想自己開心d,都要自娛一番. 我要開心..我要開心....

壞習慣

2007-10-31T22:11:00.000+08:00

尋晚媽咪叫我番屋企飲湯,雖然收8點,都去la.點知OT都9點幾先走得,番到屋企,食完飯都10點半,同媽咪講今晚吾走了.細佬第日又吾洗番工,仲諗住問佢借鬧鐘.最後用左手機鬧鐘...
可能好耐無番屋企瞓.瞓得吾太好,好醒.到半夜,細佬鬧鐘响???! 吾係吾洗番工咩,做咩會响呀. 個鐘嘈到停左, 無人理. ( 我細佬從細已經吾會比鬧鐘嘈得醒,日日媽咪就叫佢起身, 番工,食飯,去街,起碼叫半個鐘). 到第2次响,又係响到個鐘停,我心知不妙,再係咁,樓上樓下報警都似. 第3次,我忍吾到,去佢間房, 拎走哂D電, 看看細佬,一D反應都無. 看看個鐘.5點 !!!!!!!!! 回到床上,(我同媽咪瞓),佢好慢條斯理話,佢係咁,日日都係咁....???!!! 亞媽, 佢咁樣,咪你種壞low !!!!

我都有壞習慣,洗完面個洗手盤呀,地下呀一定濕哂.老公次次鬧. d 紙巾用完吾即刻掉,床頭呀,電腦枱呀.soft一定有紙巾. ....

我相信人人都有壞習慣,但...真係吾好影響人呀.

機師的英語水平..

2007-10-26T22:51:00.001+08:00

http://www.youtube.com/watch?v=P6e7HSeq3OY

好可怕呀...

無理取鬧

2007-10-25T22:03:00.000+08:00

休息左4日.今日番工, 就比人無理取鬧了一番 !! (吾知講左出黎會吾會人告tim)...
話說一開工.有一pair人走黎我counter.(開頭我企左0係後面見吾到有人.之後聽到有人講野先發現佢兩個). 咁我好似平時咁問..答.. 一直都相安無事. 之後個女的問我. 係咪有韓國機去大板,我話係呀,不過要轉機wor. 點知佢兩公婆突然係咁鬧我.話我知吾知咩叫轉機,我話,先生,個行程係HKG先去韓國,再去大板, 吾係直接去大板,咁咪係轉機low.點知佢就話你咩態度呀.最好笑係無la la 話我咩狗眼看人低. 我真係一頭都係問號,吾知點解.當時我一d都吾嬲,去旅行啫.吾鍾意咪報第2間low. 吾通同你嗌交咩.你覺得係咁咪咁low. 我吾想為左咁動氣.事後同我同事講番,佢話比我就同佢鬧過la..咁又何苦呀. 如果佢鬧完,問左其他旅行社,個個同佢講吾係直飛,我諗佢係一個正常人都會內疚la.一個大男人虾個妹..

付出

2007-10-22T23:35:00.000+08:00

好幾日無入電腦房, 無入廚房,咩都吾想做.向公司請了幾日假,咩心情都無..
老公不停逗我笑, 逗我玩,我都無心機.個人好攰. 老公要轉夜了. 我諗,不如先搬回媽咪度住幾日,起碼有人陪我,有人煮飯我食呀,不過一諗到會見吾到老公,就突然喊起上黎,仲一發不可收拾0個種,嚇得老公吾知點好.. 不過就可能係咁,發洩左之後個心又定左d. 早兩日奶奶來了煲粥比我食.精神好似好d,胃口又好番d.點知今朝起身竟然有鼻水.真吾生性!!!
老公話:我可能吾係世界上最好的男人,但一定係對我最好的男人.
佢同公司請左2日假陪我. 我知佢都好攰.煮飯,洗碗,吸塵咩都做,一句怨言都無,老豆成日教我地.做人吾好問收穫.吾好理有無著數.我老公真係做得到. 到我好番,我會好乖ca ka...^_^

爸爸給我的禮物

2007-10-19T10:48:00.000+08:00

10幾年前了....媽咪話.daddy好鍾意賭馬.次次贏$, 都吾會儲起,一定會請婆婆一家大細食飯. 我最記得的是龍虾伊麵底.次次上大酒家,一定有好多魚虾蟹.

有一次,我吾知佢嬴左幾多$,就買了這個琴比我. 我好開心,晚晚放學番屋企就練.直至我搬,都要搵專人搬,吾可以比佢有傷痕..這是daddy番比我最珍貴的禮物之一....

最記得細個時睇歡樂今宵,很夜了,你先至收工番黎. 媽咪就即刻整熱d飯你食,我就扮瞓着了,你就會抱我番房瞓.0個時就諗,我又呃到你呀...其實.做爸爸的點會吾知仔女的頑皮想法,到我地大個,你就講番一早都知我好扮瞓...ha ha ha..

今日重陽節, 因為身體吾好,去吾到拜你. 好掛住你..尤其係我0係最開心或者最吾舒服時.想同你傾訴時. 我成日諗,10年了,我同你講野你聽吾聽到,你0係邊,你投左胎未...老豆,我真係好掛住你..

說不出的話..

2007-10-15T22:42:00.000+08:00

早幾年學了幾個月的手語,現在已忘記得七七ハハ.當時好多同事問我.點解咁多野吾學,走去學d咁特別嘅野, 其實主要係因為daddy病重時講吾到野.寫又無力,佢想點我地都吾知.我就諗起手語,第時我咁吾好彩同daddy一樣,起碼我做d動作,會有人明白.(當時我番屋企有教亞mic) .2黎.其實我有時真係吾想講野. 心情吾好,起碼我做手語,吾講野吾會發脾氣 !!

今日收到哥哥的sms.佢知我吾太舒服,叫我樣樣小心. 幾個字,我0係車上看完,吾知點解眼睛竟發熱,紅了, 差d流出眼淚. 我同哥哥關係吾太好,細細個已經係咁,講吾夠3句就嗌交. 收到這個sms.好warm..

今朝坐bus番工.有個女仔的電話不停响著"傻豬豬". 可能係一d sms的提示吧,見佢一聽到這個"傻豬豬"的發聲.佢就按一0下電話, 重覆又重覆,從沙田到九龍未停過,周圍已好多人望佢,佢都無反應, 真係太擾人呀.. 其實咁多野send.不如打比佢la. 吾好嘈住人呀ma.....

今日同媽咪傾了一陣電話. 知道佢都好擔心我. 因為我不嬲都易暈,原來佢仲打比亞mic.問佢今晚煮咩比我食.ha ha.. 我都大個女了.仲當我係bb...!!!

說不出的話有很多,我成日0係blog 上 say ma ma i love u. jeffery i love u. 但我只會同老公講i love u. 從無當面同媽咪講我愛你.. 我諗..我要學講呢句說話..

愛心雞湯

2007-10-14T23:01:00.000+08:00

今日媽咪同好多親戚去拜公公.我一黎要番工無去,二黎早兩日去舅父度,佢話我血壓低,我就算吾洗番工都吾去了,未行到上宝福山我諗我已暈左..(上星期同老公睇相機,睇睇0下眼前一黑, 差d暈倒,好彩門口有pacific cafe.坐低一陣成身漂冷汗之後無事). 不過下星期重陽節吾可以拜老豆了..

媽咪知我又頭暈,"鵝"左一陣,就話拜完公公上我屋企煲番d補湯我飲..oh.ma ma. i love u ^_^

佢地飲左好多,都仲有差不多2-3碗,老公就幫我倒起,明天又有得飲.

單純

2007-10-13T22:50:00.000+08:00

老公家姐同老公講:做咩你老婆越來越蠢.
老公答:佢都未醒目過.佢不嬲都係咁.
奶奶話:係呀係呀.我初頭見佢,覺得佢好壞,會教你tim 呀. 不過宜家知佢係"檬成成"ca.. ( 因為好耐之前我右耳有3個耳洞.戴左好多耳環)
老公話:佢得個樣.人人以為佢好醒,咪比佢呃哂low..

我吾怪佢屋企人咁睇我.反轉頭諗.好過比佢地感覺我係衰人壞人. 其實...我都係單純d啫...ha ha ha....

老公有個同事,佢2公婆開頭同佢奶奶住,結果反面收場,要搬出去住,關係差左好難補番. 我好幸運.我奶奶屋企人對我好好,我屋企人對mic 更加好到吾洗講. 爸爸成日話:打死不離親兄弟,做到兄弟姐妹真係好有緣份,6百萬人中都比你識到的朋友,又係緣份.大家都要珍惜呀.

秘密

2007-10-12T22:26:00.000+08:00

今日無故想著..,blog=網上日記啊,可是自己懶得太緊要,一個月才寫幾日. 點好....

今朝打比老公,同佢講我今晚講個秘密佢知,點知佢係都要估.好la.點知佢一估 : 你整爛左風扇??!! 我話有無攪錯呀, 錯呀, 認真d la. 佢估第2次: 咁你一定係整壞個電視機...!!! @_@ '' 我問佢,點解你咁諗呀,佢話你除左整壞野之外都無咩野整呀.估吾到 !!!!
其實我無嬲佢咁睇我,反而我0係公司笑到咔咔聲.同事仲問我咩事咁開心.

老公同我講,你從今日開始要日日都咁開心,吾好諗d負面野,做人都開心d.

所以我"希望"做到日日都有開心野post , 那怕只是老公一個笑話,一個客人的傻對話.我都可以0係日後睇番會想起當時的情景.原來我真係可以日日都咁開心.可以"會心微笑" ..^_^

註米大虫

2007-10-10T09:32:00.000+08:00

我當然吾係講緊我老公. 不過都吾係話緊自己.ha ha. 先要講講我地兩公婆的晚飯點解決.因為老公的工作時間太極端,番早就05:00-14:00. 番夜就16:00-02:00 . 一個月早,一個月夜咁,佢一番早,放工番黎就sleep到19:00起身煮飯同我食.佢番夜時,我咪自己食公仔麵,車仔麵low.所以屋企d米食成年都食吾哂.早幾日,老公如常煮飯,開飯時,老公說只有餸無飯.??!! 原來d米有虫呀.. 好彩係老公煮,換轉係我呢個大頭虾大近視妹煮,一定睇吾到d虫虫.... 由現在起,我地會改買2 公斤米好了.. 媽媽話,你咪買番8公斤low.比大半佢食呀.咁重,點拎呀...ha ha ha....現在,米缸都無埋呀...

早2星期,得知一同事出圑時個肺出血,要0係當地做小手術,我地好擔心會吾會好耐都番吾到香港,因為咁嘅情況應該上吾到飛機,佢屋企人第2朝都即刻飛過去,有人話佢爆肺,有人話佢肺出血..尋日呢個同事番左黎,仲買左西餅tim,見佢都好精神,佢話無la la 心口痛,呼吸吾到,咪入醫院low.仲話個肺有血.要插喉放血,一路上機都係插住,再番香港做手術,佢話做領隊好多時都爆肺,好平常.... 真係比佢嚇死.

中秋節-BBQ

2007-09-26T00:28:00.000+08:00

今日同屋企人去左白石BBQ,呢個地方我都係第一次去.好彩我地早去到,7點之後,排隊拎野食都成個鐘!! 本身BBQ無咩特別,不過比多$200 有隻豬仔燒,好得意,好好玩,睇住佢係白色,開始轉色,食得,出奇地仲係好好味..

另外見到2個表妹大得好快. 一個已識叫爸爸,一個識同你對話,分顏色,講野叻左好多. 我都吾可以吾認老了..

多謝alice0209的大禮 -- 月餅

2007-09-25T14:22:00.000+08:00

真係好心急. 上星期六alice親自送到我公司之大禮--月餅.不過竟然未食得住,要星期一先食得,日子過得真慢, 食得la. 我鍾意佢吾太甜.好好味,一個人食一個都吾肥呀.alice. 多謝你呀. ( 不過都要講sorry. 同你傾完計番入公司,同事問我做咩吾請個靚女入黎坐,我先醒起,係wor,做咩企0係出面咁耐都吾入去... 真無禮...sorry and thank you ) 靚到直情街買一樣...

CHARLOTTE CAKE

2007-09-25T14:02:00.000+08:00

請教左WINNIEVV點整呢個手指餅蛋糕,好有難度, 好易燶.又好易烈開呀. 只有30分. 下次再整!! 今晚BBQ,食埋ALICE送的月餅, 再食番咁多生果.GOOD GOOD.. (入面係水蜜桃慕絲蛋糕)

祝大家中秋節快樂.

運動的重要性

2007-09-16T22:52:00.000+08:00

今日老公陪我睇舅父,因為隻手無好過,老公話出去打支針.舅父話我嚴重左,係"堅"周炎.佢同我隻打圈時,我不自覺地流淚.成張紙巾濕哂.係好痛. 老公都呆了.不過舅父話d葯對孕婦吾好,所以吾係太嚴重都係吾開比我食. 不過提意我做物理治療,我邊有時間呀. 咁..老公就成為我的私人物理治療師la. 每朝起身刷牙我都聽到膊頭pi pa 聲,好可怕. 老公話,不如停止我們的生育大計,醫好個膊頭先.. 其實我覺得係因為我成日怕有左, 咩運動都吾做,d肌肉咪硬哂low. 平日我0係屋企跳上跳下,宜家我的運動量係零呀..各位朋友仔,你地都要做運動呀...
老公番工時,我就要用mickey 手同我鬆0下d肉 ^_^

朱古力杏仁cookies

2007-09-06T23:47:00.000+08:00

見到alice.QQ & winnievv 都整呢個cookies,我都買左杏仁整, 之前問左winnie d杏仁洗吾洗先切,佢話吾洗,不過我都係整得吾好, 雪吾夠, 一入爐就變形,不過好好味,仲有一大包杏仁,下次整好d先.
之前講過9月會有好消息,其實就係又升左職, 係呀,係又呀, 2個月升左2次. 不過無特別好開心.因為都係咁做la.點解公司咁得意,咁短時間升一個staff 2次?其實好簡單, 吾想我地走low. (我諗咋). 公司0係9月份更改左我地部門的人工計法,其實0係我地呢行呢個部門, 我公司不嬲都係全行最高人工. (我之所以可以咁快結婚.買樓(雖然吾係一次過比哂).都係多得公司. ) 可能公司意識到就算你地出到去都搵吾到呢個價, 咪改policy low. 話就係加左basis salary,不過改左commission計法.即係減人工low, 但又怕我地走,咪升職low. 公司今次升左我地department 搵$最高的3位同事, 我知係有小小吾公平,因為當中有人年資吾係最耐,不過其餘2個都係我最好的朋友,同事,所以我都替大家開心. 當我轉了制服後,即時見到有人吾開心,有人替你高興,有人對你態度改變, 我已慣了,反正只是同事,都好, 知道邊d係當你朋友. 在此希望kathy and 賓賓友誼永固,一起幫公司搵多d . 即係自己都揾多d. ha ha ha...

THE VENETIAN MACAO RESORT

2007-08-27T23:04:00.000+08:00

MACAU 28/8 會新開一間酒店, 叫威尼斯人渡假酒店, 因為我公司係全港得一間旅行社有早報名優惠. 所以呢幾日入黎問PACKAGE 都係THE VENETIAN MACAO RESORT.. 直情講野好似綠音機咁,好攰呀,好彩做到聽日,真係水都吾得閒飲!! 等遲D起哂,真係要過去玩0下.

http://www.venetianmacao.com/tc/home.aspx

另外, 祝謝夫今日生日快樂,尋日比左2封利是佢,希望佢身體健康,聽媽咪話呀 ^_^

一週回顧

2007-08-23T23:31:00.000+08:00

今個星期開始一個月,老公又要番夜,夜晚無人同我傾計,食飯了..
自身 : 我隻右手痛左約3星期,早幾日忍吾住要睇舅父, 因為想生bb,吾敢食葯, 所以吾想睇, 結果早幾日有個"吾好的親戚來了",就快快睇左佢.點知舅父話條根發炎,食住葯先,吾得要打針,葯就食完了, 無好到,吾想打針...點好 !! 老公番夜無人同我塗葯膏....點好 !!!
事業 :公司要改policy. 1/9 正式實施,表面就係加人工, 實際改左計法,都係減人工,0係咁好的市道下仲要減人工, 無奈. 不過早2個月升左職,算吧 !! 1/9 應該會再有好消息公布 ..
財運 : 0係全民皆股的情況下. 我都係無買股票,年幾之前買過一隻叫中國移動,0個時仲係19-22蚊, 賺左小小就走了,0個時成日睇住個市,(又買得小),實在頂吾住d壓力, 宜家呢隻股已升到90幾 !!! 早幾日,老公心思思又想買,就0係個市跌0個幾日,我就話好la.買小小呀. 老公睇中左一隻,佢話宜家5個2.如果聽日低過5個半就入la. 點知....係咁升... 一開就5個7... 宜家...5個9....., 呢d $. 都吾係我呢d小 c拉嫌ca la !!!!

蜜糖蛋糕

2007-08-18T22:41:00.000+08:00

看到網友QQLAM的蜜糖蛋糕好吸引,問了做法和食譜,急不及待做了, 焗的時候好香蜜糖味,好似燒緊野食咁, 食都食到好香,好似飲左蜜糖水咁,成口都係蜜糖味, 又好鬆軟,不過吾知係咪因為太鬆,切得吾靚.好散.不過真係好味. 多謝QQ ^_^

落錯車

2007-08-09T00:08:00.000+08:00

今日1號風球,番奶奶度,遲了收工.心急了.見到有車就上了, 以為中途轉車,點知坐坐坐,抬頭一看, 呢度係邊度???!!!! 係我搭錯車,定係吾記得落車...! 即刻打比老公,好彩今次佢聽電話, 再走了一會,仍要改坐的士.!!0係街上,咁啱又有人好似迷路了,向我問路. SORRY 小姐,我諗,我仲迷過你, 你不如教番我點走出呢個地方!!!

有人用搭車去形容愛情. 好多人吾會一上車就上到啱的,初戀呀ma,梗係咩都吾識,未見過世面. 佢地會中途落車, 去找另一班車. 有人鍾意坐0下的士,坐0下火車,睇0下自己鍾意咩先.三心兩意.

在此祝願每位朋友仔, 與你的伴侶,一起坐到最終站,拖著手落車. ^_^

MACAU 2日遊 - PART 2

2007-08-02T22:15:00.000+08:00

我地先去RIO 放低"行李" . 就去氹仔食豬仔包,呢間店好勁, 一日只賣幾百個, 好多時都好快賣哂.早期要排隊呀..

DINNER 去食翅,好勁呀,4個人食, 個個都先食左3碗翅,碗碗都有咁多,之後就再飲多3-6碗雞湯,點解係3-6碗,因為我就飲左3碗,老公都飲到吾知自己飲左幾多, 計埋個翅湯,真係9碗水呀,個個好似5,6個月身孕咁走....

好勁呀. 4個人食得哂...

最後梗係走吾出賭場,我同老公都吾鍾意.無玩, 睇佢地玩百加樂,睇左好耐都吾明.. 我好鍾意呢D"危紅燈".好靚, 宜家MACAU 真係好似拉斯維加斯. 我地去左利澳, 永利,新葡京,皇冠,金沙.. 行到隻腳好似吾係自己....

DAY 2 一早SWIMMING. RIO 的SWIMMING POOL NOT GOOD !! 之後我同老公行左漁人碼頭,不過太熱太哂... 溶左. 一張相都影吾到, 直頭開吾到眼.....老公都話頂吾住,不過無法!!!

其實新葡京都未起好,不過個賭場已先開, 何生真係想吾發都吾得 !!!!

MACAU 2日遊 - PART 1

2007-08-02T21:58:00.000+08:00

先介紹0下呢間套房,一入門口,有個廳.

另一面的睡房,可以看到180度景.

一張DOUBLE BED.

TOILET 好誇張,一邊沖,一邊看景.夠膽你就打開個廉..

1/8 MAMMY BIRTHDAY, 請佢去左MACAU 玩2日. 本身我地想去DISNEYLAND.不過酒店FULL 左, 得番貴房,要2千1 . 計埋入塲票,食飯,要4千蚊,我地都公都認為吾值,BKK. TPE 又無哂機位,最後就去澳門了.. 今次住利澳,媽咪話亞叻介紹好靚,咁我又利用公司的"福利"去訂,SEND NAME CARD 做房... 最後CHECK IN 時發現......佢地UPGRADE 左2間DELUXE SUITE 豪華套房比我地. 又再次FEEL 到,原來0係呢間公司做,都吾錯呀....

班蘭小蛋糕

2007-07-29T09:32:00.000+08:00

成日都好想整這種小小的蛋糕, 一口一個,相信老公會食,(整一個大蛋糕,老公是不願食呀).好早期已買定細紙模,不過有次蒸蛋糕仔用過,原來吾夠力托住.就成日心思思買個細模,不過好貴.早排經過永安,減價,見到很細的silicone muffin mould.$24 12個, 梗係即買la. 結果就整左個斑蘭蛋糕,焗0個時好香,不過食又吾係好出味. not too bad la ^_^

諸事不利

2007-07-12T00:07:00.000+08:00

6/7 一落機, helen電話己響起,原來老爺4/7入了院,發高燒, 本身plan左沙巴之後同佢去macau,我地又去廸士尼,宜家就日日去hospital !! 可能自己身體真係差, 結果都中左. 感親 !! 老爺出了院就到我病.老公又吾生性,攪到我0係奶奶面前發脾氣.真失儀 !! 嬲左老公2日. 佢放9日假,我放10日,本身最後一日自己free time 可以做好多野,最後都係sleep.sleep and sleep !!! 葯力大強,無法 !! 今日第一日番工, 隔離同事話我吾0係度呢幾日, 佢爆左好多單野, 要賠$ 的有, 比客鬧的有. 咩都有. 我心諗,我無咁大威力,你要爆,我吾0係度你都係爆!!! 清左3百個email. filing. 已收工, manager 約食飯,因為公司要改policy.改左幾次都比我地d senior 彈番轉頭. 0個頭開飯,jeffery 打黎話媽咪0係屋企暈左,宜家0係hospital. 原來又係感冒未清,煮完飯0係kitchen一出黎就暈左. call左白車. 宜家無咩...

又聽到jeffery 話 "佢" 原來已簽紙離婚. 呢一個 "佢" 吾係指jeffery. 未經我親耳聽到,我都未敢confirm. 不過人真係好矛盾,其實有小小開心,起碼都係一個解脫, 又一條好漢,快快搵個第2個la. 吾開心係, 始終有小小-- 寧教人打仔莫教人分妻的feeling ..." 佢 " 始終係我一個親人呀...

咁多吾開心的事, 真係想放一多次大假. 遠離呢個地方,咩都吾諗..... 希望在明天呀.....

x-光..

2007-07-08T08:46:00.001+08:00

0係L4 0個一點就係舅父所講的骨刺, 而我條腰亦都係由L4開始係斜的.

係咪好恐怖呢..

沙巴之旅- day 4 -- last day

2007-07-07T08:38:00.000+08:00

因為12點機回港,咩都做吾倒.只係食完早餐,0係酒店影0下相就check out 了. sabah airport 好細, 我地買左小小手信,呢度仲平過市中心. 我地各自買了一盒sabah好出名的雪條,有好多味,最好味係榴槤,吾同香港7-11 0個種,濃味好多. 之後就入閘,同sabah say good-bye la.

今個旅程同老公一樣,日日咁開心, 酒店好細心,好sweet 的安排,我地好感動. 玩又好玩,食又吾錯.只係玩到攰哂. 總之就係開心la ^_^

沙巴之旅- day 3

2007-07-07T07:57:00.000+08:00

呢個就係激流. 真係好多大石,幾danger ka.

dinner 食海南雞,成間飯店只有6,7個菜,只有2種飯,一個海南雞,一係义燒飯 !!!!!!!!

5/7. 今日個body已不受控制,想舉高手,想行快d都吾得,好痛!!尋日玩隻飛魚太用力呀. after breakfast就出發玩激流.本身0係酒店book好, 不過尋日接我地去沙比島個agent 又sell我地, 我地講價,平左$25@person. 係馬幣wor. 4個人平左HKD100有多,咪轉去佢地度low.我地玩2級.上山都要2個鐘車, 仲見到另一間hotel - shangri-la rasa ria. 原本我有諗過book 2 night shangri-la ,2night magellan. 不過之後改早1日番,先至無book.好彩呀,原來真係遠得過份,周圍咩都無,只適合打golf 同埋與世隔絕嘅人住呀!! 到了. 見水流吾係太急,吾太擔心.聽完工作人員教導後就落水了. 一開始有一個大浪,前面已有個人掉了拖鞋落水,我地就互相用支杆 "bu" 水去人地度. 幾好玩呀. 玩左個半鐘倒到了, 食左個lunch ( include 左) 就走了. the lunch not good 呀 !!! 番左酒店沖身.坐shuttle bus 去center point sabah. 係呢度最大的shopping mall. 真係吾arm我地hong kong people low !! waiyuk 提議去食海南雞飯,佢上網話好出名,行左好耐揾左好耐先揾到.佢地就好鍾意,我只食了一半. 今日好攰,早d番去酒店瞓 !!

沙巴之旅- day 2 -- part 2

2007-07-07T07:34:00.000+08:00

就係呢d燒雞翼呀,串燒呀,附帶好多烏蠅. ( 其實好香.不過我地吾敢食)

呢度係for "不夜天"食客一路食飯一路睇日落.

0係市集中好多呢d當地食物,好多燒魚,燒蝦,仲有烏蠅.我地食左三角形0個個,又吾錯wor.中途有個香港男人走埋黎問我地食吾食炸香蕉,佢地買左食吾哂. $1 馬幣有10條. (就係我地隔離0個d).

一部份街市.好多菜,seafood,乾貨.

玩到3:30pm.先番酒店. 再去左handicraft bazaar.呢個係當地人的手工藝市集+街市,前小小就係一條海濱長廊,好多情侶睇日落,仲有幾間海鮮飯店,例如最出名的"不夜天" . 不過網上說這裡是比較貴的,其實大家都攰,行左一陣番左pacific hotel 食dinner, 因為magellan & pacific hotel is same,我地可以共用facility.酒店送左1個dinner 0係pacific hotel0個邊,所以就過左去,不過以hotel buffet 黎講,真係ma ma !!! 之後行番去magellan.講0下笑,影0下相,又一天了..

沙巴之旅- day 2 -- part 1

2007-07-07T00:30:00.000+08:00

係個艇員幫我地未開始時影,個個好開心,之後就叫help....其實左.右2個最吾安全.中間2個人有2個位比佢地撐住. 我地有1邊無得撐.(我右腳其實撐吾到,一大力撐已經係水) 呢張相係用水底相機影的,我地再用數碼相機影呢張相,所以張相有d怪怪的)

d海膽係0係個碼頭影. 仲有好多..

另一碼頭,個海仲多..

bbq lunch.都有蝦.蟹,魚,但仲有wo 蠅... so dirty

可以留意0下係2指同中指骨位紅左,其實吾只紅左,係腫左,因為捉得太大力.

4/7.尋晚瞓得吾好,我不嬲都好怕瞓生保床,酒店床又淋,條腰好痛.2點幾,3點.5點,6點都醒左. 今日都係一早食個breakfast.就出發出island.本身我plan左只去馬奴干島,因為好多魚,水清.有珊瑚.原來加多20可以去埋沙比, ( 沙比只有香蕉船呀,水上電單車0個d,我地都無興趣,不過加20又include 埋個bbq lunch,就要埋la. 先去sapi island. 我地只take 左"飛魚"玩,各位吾怕水,最愛刺激的一定要玩.係咁嘅.有個人駕著快艇,拖住我地,我地係由3條香蕉船合併埋的物体.當佢開到好快,我地係會跳起,甚至飛起, helen坐前面,佢話有75度角高.我,老公,waiyuk 3個平排坐後面,佢開到好快都無事,不過佢一掟彎.我大半身已掉了落海.之前佢講解過如果你落左一半水,就要放手,其實我又怕我條腰整到,咪放手low.都吾知自己沖左去邊,條泳褲已跌了1/3. 一個人在海中心,佢地隻快艇已好遠,其實幾驚,仲要聽到佢3個0係度大笑.激死 !! 上番水又開始過,今次到waiyuk 趺落水, 第3,4次都係掟我0個邊,玩完先知原來waiyuk 同個艇員打左眼色叫人地吾好掟佢0個邊,攪錯呀 !!!
15分鐘玩完,上水玩左陣,又出發去馬奴干. 先食個bbq lunch, 好多蠅.好dirty咁,食小小就出去浮潛,好多魚,珊瑚,靚過關島呀,不過之前太用力,好攰.不過真係超好玩..

沙巴之旅- day 1 - part 2

2007-07-07T00:04:00.000+08:00

我地就係第一張枱食,台上面有好多著民俗服的人跳舞.

服務員整左個花花池. 雖然我地番到酒店d水已凍哂,但個心真係好warm..

這是dinner 的地方,好大型的food court.不同酒家,食堂咁,仲有馬來西亞人跳舞.

叫左helen & waiyuk 黎食蛋糕.

張床最好笑,好誇張呀,好開心的.

今日無plan 行程,主要想休息0下, 0係swimming pool 玩左一陣,0係池邊食左個pizza就番上房,跟住0係樓下book明天的local tour, 就坐的士出市中心找supermarket.之後就dinner.同事叫我一定要食"天天"的sea food. 話講中文一定識,點知問左receiption 都吾知,攪左好耐先知吾係叫天天,係叫雙天!!!又幾平呀,食左好大條班(好滑),老虎蝦.沙巴薯仔菜(yumi推薦).炒飯.扇貝.串燒...好多,都係hkd500.係好好味..之後番酒店..wa wa wa...做咩間房吾左樣 ??!! 張床多左大蝴蝶.有birthday cake. 仲有人"教"堆水,整堆花花0係浴缸... 好細心,好浪漫,好意外呀...

沙巴之旅- day 1 - part 1

2007-07-06T23:40:00.000+08:00

hotel lobby 的一小部份.

上面呢個係其中一個露台. total 有2個.呢個0係廳,另一個0係房0個邊.

呢個係其中一個洗手間,當然有企缸 & 浴缸 . 0係個廳度可以行入去的. ( 好有情調呀...)

呢邊係睡房, 一入房已有一朿花在床頭. 真細心呀.出面都係露台, 看海的,晚上聽著浪聲瞓.

這間是客聽的另一間房, 4個人可以開枱呀.. ( 不過之後0係度食蛋糕 )

這個客廳.上一張相的( 房仔) 就在soft後.

3/7 . 是我的生日. 4:45am起身,出發到馬來西亞的沙巴. 好開心.上年無去旅行,今年要玩個夠呀.先介紹今次的hotel - sutera harbour magellan wing resort. 離機場5分鐘車程,是市中心,很方便的.因為自己係travel consultant.同呢間hotel 不嬲都有contract,一早同左佢地講我係birthday and honeymood . 所以一早已知道可以upgrade, free 1 dinner and 1 night free. 呢間hotel 分pacific wing & magellan wing. 加堆私人沙灘,golf 場. 真係好大. 不過最意想不到是,當我check in 時, 佢話upgrade 左一間豪華海景套房比我. 當我上到房,我地都嘩嘩聲.真係好靚呀...

可怕的小強

2007-06-27T22:55:00.000+08:00

早前提過我遇到小強會點,今次主角不是我呀.是我的最好朋友....
尋晚12點幾,我的好朋友"小燕" 打黎問我老公0係咪屋企,佢好驚,原來佢屋企飛了一大隻小強入屋,佢老公番夜,收4點. 無方法之下打比我求救. 天呀,吾好話幾大隻呀,仲要飛wor !!!mic 又係收2點.我只好陪佢傾電話,等mic番low. 大家傾傾0下已2點,mic 回來了,我二話不說叫佢去小燕度, 攪左一陣佢就番黎了. 所以話,屋企一定要有一個吾怕小強的人呀. 你話如果mic番overnight, 我地2個會點呢, 可能會叫小燕黎我度過一晚呀...
介紹一0下小燕先,佢係我幼稚園,小學,中學的同學, 住同一條村, 到我結婚,我又係搬去同佢一個屋園. 咁arm又住17/F . 對面樓, 我地吾係成日傾心事,不過好多野心照,睇住佢拍拖,結婚,生仔,真係好開心. 佢不停SAY THANK YOU, 其實真係無計,佢真係好好人KA.
老公番黎,梗係話我地2個傻婆LA. HA . 我地吾傻點影得你地D男人叻叻呀. 不過咁, 佢今次吾單只幫左小燕,仲幫自己加左好多分TIM. 算你LA .

傻佬聽日生日,不過我地都要番工,食DINNER 都吾得,要後日先得了, TOO BAD.. 連蛋糕都無呀....

頭先去左亞姨度食飯,表妹煲湯,勁呀, 不經不覺佢都好大了,自己都吾細了..HA HA.. 之後同MAMMY 傾計,得知哥哥好似睇開左. 我都放心了,希望佢快D無事LA...

BLUEBERRY MUFFIN

2007-06-21T16:06:00.000+08:00

這是我今日的下午茶,加左奶,入面濕濕的,不似平時做的乾,一出爐已即食2個.好味.

雲石磅蛋糕

2007-06-12T10:41:00.000+08:00

尋日係結婚一週年,同左媽咪細佬食日本野,吾錯呀,又平, 媽咪好攪笑,佢一早打比我問我有無飯開,我話無呀,出街慶祝呀,佢話咁最多我坐堆一邊吾阻住你地la...

收到妹妹sms祝福,仲比左好多生仔的information我, 多謝哂 ^_^

今日day off. 一早起身發現屋企無野食,(我又懶落街食),就是但整左個磅蛋糕,我太貪心,加多左可可粉,所以整出黎吾"雲石". d 可可粉又攪得吾均,結果上層古力味, 下層牛油味....

第一次---送花 !!

2007-06-09T08:30:00.000+08:00

老公成日問我鍾意點樣嘅花,我話一支太陽花,佢話邊有人鍾意一支ka,我話我low !!

尋日無la la 話,你出廳呀,我送左份gift比你, 奇怪,做咩吾係親手比 !!

係呀,老公第一次送花比我,因為下星期一係我地結婚1週年la.好快呀...

老公 : 我專登出街買,揾左好耐,之後比我見到.不過原來係假的, 我問老闆可吾可以整真的,佢話可以. 講好價,到第2個幫我包0個個竟然吾同價, ha ha. 不過你可能吾鍾意我送的方式,可能你鍾意我拎住等你放工, 不過我真係做吾到. 我諗你都吾鍾意拎住周圍行.

我 : 係呀,你咁樣仲好,不過你拎住佢番黎 ?? 又無可能... 你有無用個膠袋袋住 ??

老公 : 梗係有la.咪好似0係百佳買完野咁low.

我 : .... !!!! 我都幾了解你 ....

老公 : 你生個仔,我又買.

我 : 你咪好著數? 一支花有一個仔.

老公 : 你先著數, 有老公同bb錫,

我 : 你都係ka.

老公 : 老公吾洗bb錫, 你鍚你daddy 多d定daddy錫你多d ?? bb 都係錫mammy 多d la. 你著數d.

我 : ....咁又係.... 不過都係比我諗諗先 !!!!

做好準備

2007-05-29T08:43:00.000+08:00

尋日同老公去左家計會驗血. 我又有烏龍野,(特別0係老公面前我成日都係咁),姑娘問我地係婚前檢查定係懷孕前檢查, 我同老公一齊答,不過吾同答案,我竟然話係婚前檢查,個姑娘望住我地2個,話 : 你地點ka !! 老公又話我,成日吾知自己結左婚. !!!! 呢張係一張vcd, 未睇,不過開始緊張..

好dirty 呀

2007-05-27T22:46:00.000+08:00

我好鍾意食蝦. 細個時連頭都食,大個知道個頭原來好dirty之後就無食了,開始要煮飯時都時常煮蝦,不過永遠吾知咩係膏咩係dirty 野, 直至早排看到蘇絲黃節目提到,原來只要0係個蝦眼斜斜地剪開,就會見到0個pat最dirty 的內贜 (吾知係胃定肺),結果比我見到,原來真係超dirty,原來我細個時真係食左好多dirty 野呀..... 好可怕呀 !!!!